رواية الانجبل الخامس (9) انجيل انشراح (انجيل حظك اليوم )

 

9) انجيل انشراح                  

            (انجيل حظك اليوم )       

انجيل انشراح انجيل بلا خط ولا الوان ولاتقرأه بانتظام ، تفتح الكتاب زي ما يكون حظها وتصدق المكتوب ، الكتاب المقدس زي ما تشوف الأبراج

 وتشوف حظك اليوم وبرجك اليوم وكما تتشائم وتتفائل بالابراج تتشائم وتتفائل بما تقرأه في الكتاب ، لو كلام مشجع او مفرح تفرح ولو كلام محزن او تحذيرات وويلات تحزن والعجيب هو الالتزام اليومي انها تشوف بختها اليوم تصطبح به مع كوب الشاي بالنعناع بعد خروج زوجها ومنال التي تسميها لواحظ من باب الدعابة وابنها نبيل اللي مسمياه تقيل لانه مليان وتقيل في الحركة . وكل ما تحزن انشراح تقول لها لواحظ افرحي يا انشراح اللي جاي احسن من اللي راح فتضحك وتكمل يومها

1)يوم ما يعلم به الا ربنا :-

فتحت الكتاب عشان تشوف حظ جورج أبو العيال ووجدت اخبار الأيام الأول الاصحاح 13:10 "فمات شاول بخيانته التي بها خان الرب من اجل كلام الرب الذي لم يحفظه"

بسم الصليب يموت ايه بعد الشر لا يارب وفتحت تاني الكتاب عشان جورج وجدت أيوب 9:2 "وانت متمسك بعد بكمالك بارك الله ومت"

لا لا مش معقول كده ربنا بيأكدها باين في حاجة وفتحت الكتاب تشوف حظ لواحظ اللي هي منال وجدت اشعياء 10:27 "لان المدينة الحصينة متوحدة المسكن مهجور ومتروك كالقفر. يعني ايه البنت مش هتجوز وهتقعد لي زي البيت المهجور المقفر . فتحت الكتاب تاني عشان لواحظ وقالت في نفسها العهد الجديد حلو ماله العهد الجديد وفتحت متى 8:19 "وقال لهم : ان موسى من اجل قساوة قلوبكم اذن لكم ان تطلقوا نساءكم" .

اه كده فهمت لواحظ هتجوز وجوزها يسيبها وتطلق. لا يارب ما تسمحش بكده بعد الشر.

فتحت الكتاب عشان حظ نبيل وجدت قدامها لو20:12 " ياغبي هذه الليلة تطلب نفسك منك " وماكملتش الاية وقالت : ياخبر ابيض ايه اليوم ده . بلاش الانجيل أبو عمدان خلينا في الانجيل بتاعنا القديم كله تعزيات الطبعة الحلوة دي من غير عمدان وجدت لوقا 9:4 "ان كنت ابن الله فاطرح نفسك من هنا الى اسفل " . يالهوي كده انا فهمت الواد نبيل بيقول "انا تخين وزهقت من نفسي وهانتحر " كده هو غبي هو هيطلع فوق العمارة ويطرح نفسه لاسفل ، ياخبر ايه اليوم اللي مالوش ملامح ده . طيب اشوف حظي انا فتحت مزمور24:105 "جعل الشعب مثمراً جدا واعزه على اعدائه" . ايوة كده هو ده الكلام ربنا يباركني ويجعلني مثمرة يعني ممكن اخلف تاني مش بعيدة عن ربنا وفتحت اشعياء 16:19" في ذلك اليوم تكون مصر كالنساء فترتعد وترتجف من هزة يد رب الجنود التي يهزها عليها " . يعني ايه يعني انا هارتعد واخاف ايه اليوم الشؤم ده فين ايات المعية والفرح والنصرة والبركة اختفت النهاردة يارب استر.

2) ترقب ورعب وانتظار:-

اعدت انشراح الكشري ومانسيتش تعمل حمص الشام وعشان خاطر لواحظ عملت رز باللبن ز يبتاع المحلات بالضبط وجاءت الساعة الثالثة ميعاد رجوع زوجها للبيت ولكنه لم يأتي قالت : يمكن الدنيا زحمة وقعدت تصبر نفسها واتصلت به على الموبايل ولكن الموبايل غير متاح او مغلق الساعة بقيت ثلاثة ونص وبرضه ماجاش وده كمان ميعاد رجوع نبيل ولكن عدى الميعاد وبقيت الساعة الرابعة ولم يأتي زوجها ولا نبيل والساعة أربعة ميعاد رجوع لواحظ ولكنها لم تاتي واتصلت بها لقيت الموبايل مغلق ، اتصلت بنبيل لقيت الموبايل بيرن ويرن ماحدش بيرد توقفت عن الاتصال لانها افتكرت انها سحبت الموبايل من نبيل لانه كان مش بيذاكر وبيلعب به وان دلوقت الموبايل معاها . الساعة وصلت الخامسة ومافيش حد جه ايه ده كل اللي قرأته بيتحقق ولا ايه ، جورج مات ونبيل مات ولواحظ حصلت لها مصيبة واخذت تبكي بكاء هستيري وتكلم نفسها اروح فين ياناس، واكلم مين، اعمل ايه، يارب  ارحم ، انا متشائمة من اول اليوم والكتاب المقدس قال كده وكلام ربنا مش بيسقط وبيتحقق.

3) عودة وعبرة :-

رن الجرس فقامت مسرعة وكانت الساعة السادسة مساء ودخل نبيل وقعدت تبوسه وتقول له حمد الله ع السلامة يابني ، انت بخير ؟ انت عرقان كده ليه ؟ خير ايه اللي حصل ؟ قول بسرعة اتاخرت ليه ؟

نبيل : اتاخرت ليه ما انت عارفة ياماما كل اربع بعد المدرسة باروح الجيم عشان اخس ، مالك ايه الجديد .

افتكرت انشراح ده صحيح وسالته : وفين اختك المحروسة ؟

نبيل : قابلتها واقفة تحت السنتر بعد الدرس بتاعها وقالت لي امشي انت عشان هاتاخر لانها هاتحضر عيد ميلاد صاحبتها نشوى وقالت لي اقولك انها هاتتاخر شوية.

افتكرت لواحظ ان النهاردة بعد المدرسة عندها درس ، مش عارفة نسيت التفاصيل دي ازاي وافتكرت انها بتقفل الموبايل في الدرس ، ايه اللي خلاها تفكر كده اكيد في حاجة غلط ، بس جورج راح فين دلوقتي ؟

فجأة رن الموبايل من رقم غريب فترددت ان ترد وقالت لنبيل يرد لحسن يكون في حد بيعاكس ورد نبيل على التليفون وقال لها خدي بابا عايز يكلمك فخطفت التليفون

جورج : الموبايل فصل شحن وانا في المستشفى

انشراح : مستشفى ! مستشفى ايه ؟ ايه اللي حصل ؟ قول بسرعة حصل حاجة ، عربية خبطتك ؟ حصل ايه ؟

جورج : ياست اهدي انا في المستشفى مع ماما ، تعبت شوية واتصلوا بي في الشغل وبعد كده الموبايل فصل شحن . هي مش قادرة تاخد نفسها وهي دلوقتي في الطوارئ وشكلها ها تتحجز ، هاسيب اختي تبيت معها وبعد كده هاجي . وقفل السكة .

قعدت انشراح مع نفسها وفكرت في اللي حصل لها فقد انهارت وكلمة امرأة ابونا وحكت معها وقالت امرأة ابونا لها : يابنتي الانجيل مش كتاب حظك اليوم الانجيل كتاب يتعاش لازم تقرأي فيه بانتظام وبترتيب بروح الصلاة . انجيل يعني بشارة مفرحة مش رسائل محزنة ومرعبة حقيقي هي تحذيرات ووصايا لفائدتنا ، ومش كل الايات اخذها على نفسي ، في كلام اتكتب لظروف معينة ولاشخاص معينة حتى نعتبر من حياتهم  ومش نفسر احنا الكتاب بطريقتنا ، يعني ايه يعني تفسري آية تجربة الشيطان للمسيح "اطرح نفسك" هو ده معناه ان ابنك هايرمي نفسه من فوق جبتي التفسير ده منين . انت بتعملي انجيل تاني بتفسيراتك ليس له علاقة بانجيلنا . انت تعطي ابليس فرصة ليلعب بك ويؤثر عليك ويخوفك ويتعبك نفسيا وجسديا وروحيا فلا تعطي لابليس مكان . فاهمة يا انشراح ؟

انشراح : فاهمة واوعدك اللي جاي احلى من اللي راح .