رواة الانجيل الخامس (5) انجيل موريس (انجيل بلا ارسالية)

 

(5) انجيل موريس

                                  (انجيل بلا ارسالية)   

انجيل موريس انجيل لا يوجد به آيات عن الكرازة والارسالية ، يؤمن بالآية "غير تاركين اجتماعنا كما لقوم عادة بل واعظين بعضكم بعضاً " "اخدموا بعضكم بعضاً " "ها انا معكم كل الأيام والى انقضاء الدهر" "انتم ملح الأرض انتم نور العالم " "فيروا الناس اعمالكم الحسنة فيمجدوا اباكم الذي في السموات "

قال : نحن نكرز بحياتنا وشهادتنا عن المسيح بسلوكنا مثل الملح والنور نكون لهم  والرب يختار الذين هم له المعينين للحياة الأبدية فلا داعي للتبشير ولا نترك اجتماعاتنا ونخرج للكورة البعيدة لاجل الضال والمسكين هذا عمل المسيح . نشهد للمسيح بسلوكنا اليومي ونصير انجيل معاش فنحن رسالة الله المقروءة لجميع الناس.

1)دعوة للكرازة :-

قال امير قائد اجتماع الشباب يا اخ موريس بصفتك المسئول عن الاجتماعات الفرعية في الكنيسة قدام المجلس ، احنا عايزين نعمل حملة كرازية في احدى القرى في اطراف الجيزة وبعد كده نعمل نهضة كرازية.

موريس : بس ده مكلف ومحتاج ميزانية وميزانية الكنيسة لا تسمح

امير : لا تقلق احنا جمعنا تبرعات ومعانا فلوس كفاية

موريس : بس انت مش شايف الشباب محتاج يتبني الأول ويتعد كويس ويتدرب على الكرازة والعمل الفردي قبل ما ينزل الخدمة دي

امير : احنا عاملين كورس كرازي الأول وتدريبات على الزيارات والعمل الفردي اكيد مش هننزل كده.

موريس: انت مش خايف عليهم من الجماعات الإسلامية والمتطرفين لما يشوفوهم بيلفوا في الشوارع يؤذوهم .

امير : واحنا مالنا بهم احنا بنزور المسيحيين وعندنا حكمة لا نمشي في تجمعات والرب هو الحافظ وهو اللي بيتقدمنا

موريس : اكيد الحمالات دي أولاد وبنات مع بعض ، اكيد في بيوت ممكن يكون فيها بنات او ستات نعرف نتواصل معاهم من خلال بناتنا . مش خايف عليهم من الاختلاط؟

امير : هو في ايه حضرتك حطيت قدامنا العراقيل والمخاوف هو حضرتك عايز ايه بالضبط ؟

موريس: انكم توفروا مجهودكم وفلوسكم وطاقتكم في بنيان الكنيسة ، كنيستكم أولى زوروا الناس اللي مش بتيجي ولا انتم زي القرع بتقبوا لبره؟

امير : هو ده رأيك ؟

موريس : اه فكر فيه كويس

امير : بعد اذن حضرتك.

 

 

2) دعوة لجنازة :-

"انتقل للامجاد السماوية حضرة الأخ الفاضل موريس غطاس يني والصلاة على روحه الطاهرة الساعة 12 ظهراً بالكنيسة . والعزاء في قاعة المناسبات بالكنيسة الساعة 7 مساءاً

___________

امير : انا مش مصدق ده انا كنت لسه مكلمه امبارح وكان في تمام الصحة

مامته : كان رجل محترم وتقي وكان شايل الكنيسة على اكتافه

امير : بس هو لسه صغير

مامته : كان هيطلع معاش في شهر سبتمبر اللي جاي يعني ماكملش الستين

امير : ربنا يرحمه بعد اذنك رايح البيت عند عم موريس أكون جنب منسى ابنه فهو صاحبي وهاقابلك في الكنيسة الساعة 12

_____________

أتت سيارة تكريم الموتى وتجمع شباب الكنيسة وأهله وزمايله في العمل وتنافسوا في حمل الصندوق الى داخل الكنيسة في جو من الحزن والدموع واصرت العائلة على لبس ثياب بيضاء سواء زوجته او أولاده منسى وبنتيه المتجوزتين .

وقف امير بجوار منسى وأصدقائه بجواره بعد الصلاة قال القس كلمة عن فضائل أستاذ موريس وخدمته في الكنيسة التي تجاوزت الأربعين عاماً في مختلف نشاطات الكنيسة . ثم قاموا بحمل جثمانه للسيارة وفيما هم سائرون في حوش الكنيسة تحرك الصندوق وسمعوا خبط وشخص ينادي ويصرخ : افتحوا الصندوق انا حي" ارتعبوا الرجال الحاملين الصندوق ووضعوا الصندوق على الأرض في خوف وترقب وظل الصندوق يتحرك فاتى رجل شجاع فك مسامير الصندوق وفتحه واذا موريس يقوم بنصفه العلوي ويقول انا حي انا حي

انطلقت زغرودة من احدى السيدات ثم فاق الاخرين من المفاجاة وتجمعوا حول الصندوق مش مصدقين فلم يحدث هذا من قبل .

تحولت الجنازة لفرح وذهب الحزن وعلت الضحكات والبسمة على الشفاه وامتلات العيون نور وأيضا دموع ولكنها دموع الفرح ليس الحزن ولكنها مصحوبة بحيرة وعدم فهم .

اخذوه في احدى السيارات الى المنزل ليلبس وبدل من ذهابه الى مدينة العاشر لدفنه في مدافن العائلة اجتمعوا الناس في منزله من محبيه واقربائه وملاوا شقته الواسعة وجاءوا ليهنئوه على قيامته وخرج هو بكامل ملابسه وبعد ان اكل لانه كان جائع جداً ثم اجتمع بالموجودين وقال :

لقد مت ولما خرجت روحي رأيت ملائكة وذهبت معهم لفوق بسرعة رهيبة نحو السحاب وفجأة وجدت نفسي في مكان جميل واسع جداً ومنير واسمع صوت موسيقى جميلة مش عارف جاية منين ووجدت من بعيد رب المجد جالس على كرسيه ونوره كنور الشمس ومع ذلك عارف اشوفه وكان مليان حب وحنان وجمال لامثيل له فذاب قلبي في من محبته وسمعته يقول لملاك كان بجواري ان يريني مكاني ولاحظت اني كنت لابس ثياب بيضاء ووجدت أماكن كثيرة حولها ورود جميلة تتمايل كأنها تتراقص ليس لها مثيل في جمالها ومناظر طبيعية في غاية الروعة والجمال والمنازل الموجودة شبه حية في غاية الجمال وعظيمة ومنيرة وكان مكاني جميل ولكن في أماكن تانية اعظم وسألت الملاك لماذا مكاني اقل من كثيرين ؟ فقال لي :

هذه أماكن الذين رجعوا كثيرين الى البر والرب وعدهم انهم يكونوا كالكواكب لهم أبناء كثيرين في الايمان واهتموا بارسالية المسيح وبخلاص نفوس بعيدة لكنك اهتميت بنشاطات الكنيسة واضعت فرص عظيمة للكرازة للمحتاجين وكنت تعتقد ان المعينيين كده كده ربنا هيجيبهم وكنت ناسي انه كيف يؤمنون بلا كارز.

وفجأة وجدت نفسي امام رب المجد وقال لي : حبيبي ياموريس انا عارف قلبك وايمانك ومحبتك لي وعارف انك ندمان على انك اضعت فرص تحضر فيها نفوس للرب ولم تفعل وساعطيك فرصة تانية لكي تكمل خدمتك وتعمل في حقلي ليس بسبب قلبك فقط بل بسبب الصلوات المرفوعة من اسرتك لاجلك خصوصاً زوجتك التي طالبت بجرأة ان اقيمك من الأموات فاستجبت لها وسوف تاتي الي بعد ان تشبع من ايامك وتتمم خدمتك .

وفجأة وجدت نفسي انسحب من محضره ووجدت نفسي في الصندوق قعدت ارفس واخبط واصيح لحد ما اخرجتموني

3) دعوة للتبرع ببناء كنيسة :-

امير : حضرتك بتعمل معانا في الكرازة من نار مش ملاحقين عليك وتوزع احتياجات القديسين بهمة ونشاط

موريس : القرية مافيهاش كنيسة والناس عشان يروحوا اقرب كنيسة بيركبوا مواصلات اكتر من ساعة وعدد المسيحيين كتير هنا

امير : ما يقرب من عشرين الف اسرة ومافيش كنيسة واحدة

موريس: عايزين نشتري ارض ونعملها كنيسة

امير : لكن يا أستاذ موريس ميزانية الكنيسة لا تسمح

موريس : انا دايماً كنت باقول كده صح ؟ كنت اضع خط والوان على كل الايات الخاصة بالخدمة ولكن لا تستهويني الايات الخاصة بالكرازة واكرز بالكلمة واعمل عمل المبشر واكرزوا بالانجيل للخليقة كلها وكيف يؤمنون بلا كارز . كان انجيل ناقص كأن الايات دي مش موجودة في كتابي

امير : فرق معاك اللي حصلك ؟

موريس : جداً اخذت فرصة ومش هاضيعها

امير :من ساعة ما خرجت ع المعاش بقيت فاضي وعارف تخدم وتكرز

موريس: الحمد لله معايا اللي يكفيني والسوبر ماركت شغال ولو احتاجوا حاجة منسى بيسددها . المهم لمحت حتة ارض سالت عليها لقيتها ملك ورثة المرحوم فلتس وهو له بنت وولد عايشين في أمريكا نبعت لهم ونقدر تمنها ونبعت لهم الفلوس ونشتريها نعملها كنيسة

امير : بس دي مساحة كبيرة تلاقي تمنها غالي

موريس : بايمان : مش غالي على ربنا

بعد ذلك باسبوع :-

سمسار المنطقة : انا بعت لاولاد فلتس في أمريكا وسعر الأرض مليون ومائتين الف جنيه وقلت لهم في مشتري عايز يشتريها وماتنساش حلاوتي

موريس : حلاوة ايه خمسين الف حلاوة هو اخرك عشرة الاف جنيه عجبك مش عجبك خليها عندكم

السمسار : ماشي ياعم موريس بس حضرتك سايب الزمالك وجاي تشتري ارض في قرية غلبانة ليه ؟

موريس: اقولك وماتقولش لحد انت مسيحي وهاتقدر عايز اعمل كنيسة للمنطقة

السمسار فرحان : يا هده كان نفسي من زمان باتعب قوي عشان اروح الكنيسة انا وبناتي الأربعة . طيب قول كده يارجل ياطيب ده انا كنت مخصص 50الف جنيه اتبرع بيهم لبناء كنيسة في المنطقة هاديهم لك والعشر الاف السمسرة مش عايزهم هو انا أطول اخذ بركة

موريس: بارك الله فيك كده بالتبرع بتاعك جمعت مائتين الف وباقي المليون

السمسار : خذ تليفونهم في أمريكا كلمهم واتفاوض معاهم في السعر

__________

موريس وامير في الكنيسة

موريس : انا مش مصدق يا امير في المعجزات اللي بتحصل أولاد فلتس لما عرفوا اننا هانبني كنيسة أعطوا لي الأرض من غير ولا مليم وقالوا لي دي كانت امنية ابونا من زمان وكمان الاكتر انهم بعتوا مايزيد عن 300الف تبرع لبناء الكنيسة وكل اللي طلبوه عايزين يافطة بالرخام باسم باباهم ذكرى له انه ساهم بالأرض والمال في بناء الكنيسة وتتعلق في الكنيسة . كده معايا ما يقرب من نصف مليون جنيه .

المعجزة التانية : الامن وافق على بناء الكنيسة بناء على تعليمات الرئيس والكنيسة وافقت على البناء وستدعمنا بالمال والقسس وسابدأ من بكرة .

تم بناء الكنيسة في سنة وفي افتتاحها حضر جموع غفيرة وفي اخر الكنيسة بقرب الباب كان موريس يبكي فرحاً وكان يفكر في شيء واحد : فين ها يبني كنيسة تانية ؟