رواية الانجيل الخامس (8) انجيل ماريو (انجيل اجتماعي)

 (8) انجيل ماريو 

                             (انجيل اجتماعي)

(الرياضة الجسدية نافعة ) انجيل ماريو 16:3

(الرب راعي فلا يعوزني شيء ) مز 23

(انما خير ورحمة يتبعاني كل أيام حياتي قد ) ( قد دعوتك باسمك انت لي )

(فيملأ الهي كل احتياجكم بحسب غناه في المجد )

قال ماريو : اهم حاجة نبسط الزبون (يقصد أعضاء الكنيسة) بلاش نزعلهم بلاش خدمات طويلة بلاش خدمات عن التوبة والترك والخطية والتكريس . حضرتك قلت ايه ؟

باقول طبطة . عايزين نطبطب على الناس مش كفاية العالم وصعوباته عايز الناس تيجي كنيستي تقضي وقت جميل (فن داي) تفطر مع بعض حاجات خفيفة وترانيم نصف ساعة وخدمة تلت ساعة او نصف ساعة بعد كده يقعدوا مع بعض يحكوا وياكلوا فوقت الشركة مهم . ونعمل للشباب رحلات وكامبات وايام رياضية ودوري بلاش مؤتمرات الصلاة محدش هاييجي كده كده وبلاش دروس الكتاب بيبقى رخم على الناس وممل . بتقول ايه مجموعات تلمذة ، الناس مش فاضية عندهم شغل او دراسة

1)رصاصة في القلب:-

اتقابلت جاكلين مع ماريو

جاكلين : صلي لاجلي

ماريو : اصلي عشان ايه؟

جاكلين : لا اريد ان اتالم ولا اريد حد من اولادي يتعب ، باتخيل ان في حد منهم جاله سرطان واقعد اعيط عليه وبعد كده افوق وأقول ايه اللي انا فيه ماهو زي الفل ، باتخيل جوزي جت له سكتة قلبية ومات واقعد اعيط عليه واتخيل بنتي ان خبطتها عربية واقعد اعيط . تعبت مش عايزة أتألم ولا عايزة فقر ولا بهدلة ولا اني اتعب بخاف من الألم ، الم الاسنان مروراً بألم الظهر وألام العمليات

ماريو : اطمني انت بنت الملك بنت ملك الملوك ورب الارباب المحمولة على الاكتاف حتى اشواك العالم لاتجرح قدم الخروف الصغير . "انت مميز جداً مرض مما وضعت على المصريين لا اضع عليكم للمراعي الخضر الرب يوردك ، ان سرت في واد ظل الموت لا تخافي شراً يسقط عن جانبك الف وربوات عن يمينك اليك لا يقرب ، لايصيبك سهم في النهار ولا وبأ يسلك في الليل ، سور من نار حولك الرب سيج حواليك فلا يدع الألم والفقر والتعب يقترب منك فلا تخافي "

جاكلين : ياه انا اطمنت كلام حلو وجميل ومريح ، اد ايه الوعود الإلهية جميلة ومريحة

ماريو : لا تنسي عايزين تبرع عشان في ارض جنبنا عايزين ناخدها ونعملها ملعب وكانتين وانشطة للكنيسة بدل من أولادنا يقعدوا على القهاوي او يقفوا على النواصي يتجمعوا في الكنيسة احسن.

جاكلين : فكرة جميلة هابعت لك تبرع مع مارك ابني بالليل هو عنده اجتماع باليل

ماريو : على فكرة ابعتي معاه فلوس شخصية زيادة شوية

جاكلين : ليه هو في حاجة ؟

ماريو : الشباب بيحبوا بعد فترة التسبيح والخدمة يخرجوا هنروح ناكل مع بعض في كنتاكي في جو من الالفة والشركة عشان الأولاد يحبوا الكنيسة

جاكلين : فكرة رائعة ومبتكرة .    ثم انصرفت مبتهجة وفرحانة بكنيستها

___________

قال مهني (احد أعضاء الكنيسة ) : نجمع تبرعات ليه عشان عجز في كامب رياضي

زوجته : البيوت غليت قوي وكمان المواصلات غليت

مهني : قصدي لو كامب رياضي الناس بتدفع الفلوس كاملة والكنيسة لا تدعمه

زوجته : ده اهم مؤتمر في الكنيسة نسبة الحضور اقتربت من خمسمائة شخص

مهنى : ندعم المؤتمرات الروحية عشان الناس تقدر تيجي تستفاد ، مش عارف من ساعة ما جاء ماريو حاجات كتير مش عجباني

زوجته : علشان انت متعود على نظام قديم في الخدمة لا ينفع للايام العصرية نظام القسيس شكري

مهنى : ماله القسيس شكري رجل قديس وتقي ولكن عمره قارب الخمس والثمانون كان لازم يرسموا قسيس مساعد جابوا ماريو وماريو مش بيحب حد يناديه قسيس نظراً لصغر سنه ، هو غيور على الخدمة ونشيط ولكن أسلوبه لايعجبني

زوجته : انت متضايق عشان المؤتمر اللي فات لما قلت لبنتك استفدت ايه من المؤتمر قالت لك ولا حاجة ده مؤتمر ترفيهي ورياضي والجرعة الروحية صغيرة قوي

مهنى : الحقيقة اه ولكن من الحكمة ان لا ندين انا باصلي لاجل الكنيسة والقسيس وماريو وكل الخدام

زوجته : عمال تتكلم والاكل برد كل بقى

______________

خرجت ناردين بنت مدام جاكلين من الكنيسة ووقفت على الباب تنتظر صاحبتها نانسي وفجأة ظهر موتوسيكل عليه اثنان واحد منه في ايده رشاش آلي وضرب على الواقفين على باب الكنيسة وانطلقوا هاربين . توقف الزمن لحظة واتصطدم الجميع وجدوا جندي الامن مصاب وغرقان في دمه وثلاث شابات وشاب غرقانين في دمهم واضح ان اصابتهم خطيرة وواضح ان ناردين ماتت فموضع الدم في القلب رصاصة اخترقت ظهرها الى القلب .

2) رصاصة في الايمان :-

انهيار ... اقل شيء يوصف به ما تمر به عائلة جاكلين وما يمر به الشباب في الكنيسة لم تكن الرصاصة فقط في قلب ناردين ولكن في قلوب كثيرين كانت الرصاصة في ايمانهم وثقتهم في ربنا

قال القسيس شكري لماريو : انت وضعت الناس في فقاعة وردية ضخمة فلا يوجد حزن او ضيق او ألم أو فقر كأنهم ذهبوا للسماء وهم مازالوا في الأرض ، هم شعروا بالخديعة وعدم الأمان والثقة في الرب الذي قدمته لهم

ماريو : لم اتخيل ان أرى رد الفعل كده ، عائلة جاكلين لم تحضر الكنيسة من فترة والشباب في غضب من الرب ومدام جاكلين قالت : اين سور الحماية من نار حول عائلتي وأين لايصيبك سهم في النهار اهو اصابتنا رصاصة في النهار ، فين رعاية الرب ولا هو كلام وخلاص ومسكنات عشان نعيش في غيبوبة عن واقع الحياة المرير ، ليه بنتي هي اللي تموت بس ده سماح من الرب ولا دي مشيئته ولا مشيئة بشر وتعضيد ابليس

شكري : لاحظت انجيلك اللي تقدمه ، انجيل اجتماعي هدفه انك تبسط الناس لا ان يخلصوا ، قدمت لهم المجد بدون صليب وبدون ألم قدمت نعمة رخيصة . ولكن لقد وهب لهم ان يتألموا معه قبل ان يتمجدوا معه ، انجيلك ملون ومخطط على الايات المشجعة والجميلة والمريحة دون التزامات او ألم او تضحيات او صليب

ماريو : اعمل ايه دلوقت؟

شكري : ابدأ بتقديم انجيل متوازن بين النعمة والجهاد ، بين المد والألم ، القداسة والجهاد مع المحبة والرحمة . فاكر لما اخدت خدمة عن القداسة الشخصية انت اعترضت وقلت لي الخدمات دي بقيت قديمة هي حلوة ولكنها مش نافعة للجيل ده

ماريو : ما انا خفت الناس تمل وتزعل وتسيب الكنيسة وحياتهم فيها مشاكل أخلاقية مش عايز اسبب لهم احراج

شكري: يجب ان تواجه الناس بخطاياهم الرسول قال لتيموثاوس "وبخ انتهر عظ ولكن بكل اناة وصبر" يابني الكنيسة مش نادي اجتماعي الكنيسة مستشفى للمرضى الروحيين والتعابى لتريحهم والرب يسوع وصف نفسه انه الطبيب للقلوب الجريحة . لازم تقدم يسوع الملك المخلص رب الارباب القدوس الذي لا يساوم على الخطية نعم الرب يسوع يحبهم ولكنه لا يحب الخطية

ماريو : عندك حق الانجيل الاجتماعي ليس هو رسالة يسوع . قررت اعيد ترتيب اوراقي واولوياتي وافعل مايريده الرب مني ولا ما اريده انا .

 

3)صلوات نارية كالرصاص :

زاد الحضور في اجتماع الصلاة وامتلأ الاجتماع بشكل غير مسبوق لقد ادركوا ان ليس لديهم قوة ولا ايمان كافي لمواجهة العالم والخطية وابليس وانهم يحتاجون للاقتراب اكثر للرب ليكونوا اكثر قوة ونضج لمواجهة الالام في الزمان الحاضر.

تم الغاء الكامب الرياضي لاجل الاحداث وعملوا مؤتمر صلاة واشتعلت الكنيسة بنيران من العلي فتاب كثيرون وتركوا حياة عدم الالتزام والخلاعة والخطية وصار الكتاب المقدس غايتهم وشوقهم وكانت الصلوات تخرج نارية كرصاص نحو السماء

___________

كان حضور يوم الاحد مهيب لقد جاءت اسرة جاكلين لابسين ملابس بيضاء وكانوا فرحين قائلين لقد زفينا عروسة للسماء الرب يستحق اغلى ما نملك ونحن اعطيناه ما نملك وبعد الاجتماع قالت جاكلين للقس ماريو : انا عارفة انك كنت بتحاول تشجعني ، انا كنت باضحك على نفسي وبتهرب من تحمل المسئولية مسئولية حياتي ومسئولية من حولي ، احنا عرفنا الرب يسوع وقت الألم وكان اكثر قرباً من معرفتنا به وقت الراحة فلا تقلق علينا نحن اكثر قوة بما حدث.

تركته وكانت بداية جديدة للكنيسة والخدمة