شياطين النت 6) أما تقدرون أن تسهروا معي ساعة واحدة !!

 

6) أما تقدرون أن تسهروا معي ساعة واحدة !!

كانت أول ليلة لمودي في القاهرة منذ أن دخل الجامعة الخاصة في مدينة 6 أكتوبر كلية الصيدلة وقرر أبوه وعمه أن يقيم مع عمه في شقة عمه في المهندسين حيث أن كل بنات عمه اتجوزوا والشقة فاضية ما فيهاش إلا مارتن أبن عمه اللي معاه في نفس الجامعة ولكن كلية علاج طبيعي وهو في الفرقة الثالثة . وكان مودي محبوب جداً لعمه وأهلهم لبشاشته وأخلاقه ويشعروا أنه بركة في البيت .

قال مارتن : النهاردة السهرة في الدور الثاني عند مراد في حتة فيلم منزله من على اليوتيوب فيلم أكشن هيعجبك أخر فيلم أمريكي عملته هوليود فيه أكثر من نجم من نجوم المصارعة .

مودي : أنتم بتسهروا كده على طول ؟

مارتن : هو احنا ورانا ايه احنا لسه أول سبتمبر وناقص على الكلية أسبوعين ممكن نروح خلال الأسبوعين مرة أو أثنين نضبط المصاريف ونعرف المواد والجداول .

مودي : كل يوم سهر ؟ !

مارتن : كل يوم في بيت واحد شكل العمارة دي فيها 48 شقة 12 دور كل دور 4 شقق أنا مصاحب شباب في حوالي حاجة وعشرين شقة .

مودي : فيهم ناس مسيحين ؟

مارتن : دي عمارة المعلم جرجس مش بيسكن إلا النصارى مش شايف صورة مارجرجس الكبيرة التي في مدخل العمارة .

مودي : بس أنا سهري غير سهرك أنا عامة مش بأسهر علشان صحتي ولو سهرت يبقى علشان أصلي.

مارتن : تسهر تصلي ! حلوة دي ده عندكم في سوهاج مش في المهندسين .

مودي : عموماً أنا هأحضر معاكم النهاردة مش هانام بدري.

مارتن : هو ده الكلام هتتبسط قوي .

+++++++++++++++++++

اجتمع حوالي ثمانية شباب في شقة محب في الدور الثاني عنده شاشة كبيرة جداً تحتل تقريباً الحيطة كلها كأنها سينما.

عملت مامة محب فيشار للشباب ودخلت تنام في حجرتها كانت الشقة كبيرة وحجرات النوم منعزلة عن المكان الموجودين فيه ، كان الجو مبهر والقاعدة حلوة والفيلم قصة وأكشن واتسحب كل واحد على شقته حوالي الساعة 4 فجراً.

عندما جلس مودي في حجرته على الفجر كان النوم يداعب أجفانه فهو غير معتاد على السهر هكذا.

استيقظ للإفطار حوالي الساعة الثانية عشر ظهراً.

مارتن : صباح الخير يا مودي.

مودي: صباح النور ، صباح ايه قول مساء الخير ده احنا على الميعاد ده في سوهاج بنستعد للغذاء خصوصاً في قريتنا.

مارتن : ده في القرية أنت في مصر أم الدنيا.

مودي: بس جسمي مكسر ومش فايق كأني مضروب علقة سخنة وكمان نمت من التعب وماصلتشي ولا قريت في الأنجيل .

مارتن : هتتعود

مودي: لا يا عم دي عادة وحشة خالص مش عاوزها. هو النهاردة ها تسهروا تاني ؟

مارتن : لا النهاردة هنريح ومافيش فيلم حلو .

مودي : الحمد لله . يبقى النهاردة صلاة .

مارتن : يامودي ده الشات والفيس والتويتر بيحلى باليل كله بيفتح بعد منتصف الليل ونقعد على الشات للفجر .

مودي : يعني الليل كله في الأجازات من بين أفلام وشات وفيس بوك ؟

مارتن: مش كله ممكن خروجات وكافيهات أو سينمات ونرجع برضه الفجر .

مودي : امال أنتم بتمارسوا قانونكم الروحي امتى من صلوات ومطانيات وقراءة الكتاب المقدس .

سكت مارتن فليس عنده إجابة.

وبدأ العام الدراسي وأصبحت السهرات مرة أو أثنين في الأسبوع أيام الأجازات . وسافر مودي قضى رأس السنة مع أهله ورجع بسرعة لأجل الإمتحانات حتى يوم 25 يناير الذي كان يوافق عيد الشرطة وأجازة رسمي ، انقلبت الأوضاع في مصر وانفتحت السجون وهجوم على الأقسام والبلطجية في الشوارع ونهب المحلات والحرائق .

واجتمع أغلبية رجال البيت وشبابه على مداخل العمارة وفي الشارع حماية من البلطجية خصوصاً أنهم سمعوا أن محلات نهبت والمول المجاور لهم نهب واقفلت الشقق.

 مارتن مفزوع ألحق يا مودي ثلاثة من أصحابنا في المول اللي بيتنهب كلموني على الموبايل هم في أخر دور في المول مستخبين في محل والنهب شغال في أول دورين وهيكملوا ولو شافوهم ممكن يموتوهم ، في ناس كتيرة هربت وناس ماتت .

واجتمع الشباب في شقة من الشقق وهم في خوف عظيم مش عارفين يخرجوا ومش عارفين يبلغوا الشرطة علشان مافيش شرطة ولا أقسام .

قال مودي : نصلي معاً وكانت الساعة الواحدة ليلاً.

وامتلأ البيت بالصلاة واجتمع الشبابل لأول مرة من سنين وصلوا لأجل أوضاع مصر ولأجل الأمان ولأجل أصدقائهم الذين في المول .

وكانوا يصرخون يارب أرحم أرحمنا يارب وانقذنا وبين كل فترة كان أحد يرنم فيشتركوا في الترانيم أو يقرأ جزء كتابي فيتشجعوا وفي حوالي الساعة الثالثة والنصف سمعوا خبط على الباب فارتعبوا وبصوا في العين السحرية وجدوا أصحابهم الثلاثة أمامهم وفرحوا جداً بهم وحضنوهم واشتركوا معهم في الصلاة والشكر لله وحكوا ما حدث لهم .

لما كنا في المول في أخر دور وكنا نقدر نكلمكم قبل أن تنقطع الشبكة تماماً في كل تليفوناتنا ورأينا في تليفزيون في المحل أن البلطجية هجموا على المول اللي احنا فيه وسمعنا ضرب نار وناس بتصرخ وخوفنا وقعدنا نصلي ومش عارفين نعمل ايه وفجأة جه حد شاور لنا وقلنا تعالوا ومشينا وراه وشاور على سلم وقال اطلعوا على السطح وأهربوا فصعدنا وأخذنا ننط من مبنى لمبنى وكلهم تقريباً متقاربين في الارتفاع حتى وصلنا قبل عمارتنا بعمارتين وجدنا شباب على السطح ثبتونا ومعاهم عصيان وسكاكين وقعدوا يقولوا عنا أننا حرامية وبلطجية فحكينا ليهم احنا جيرانكم ومش حرامية فربطونا وقالوا هننده أهاليهم . فضلنا ولا ساعة مربوطين حتى صعد على السطح أحمد اللي معانا في نادي الصيد وقال لهم دول مش حرامية دول أصحابي من النادي ففكونا وحكينا لأحمد اللي حصل وقال لنا مش هاينفع تنزلوا الشارع الدنيا صعبة وفي ضرب نار وبلطجية وحرامية ونطينا على سطح العمارة التي بجوارنا ولكن هي عشر أدوار واحنا 12 دور كان فرق دورين هنطلعهم ازاي .

رجعنا لسطح عمارة أحمد لأننا لمحنا سلم كبير فوق العمارة وقلنا له فساعدونا الشباب وحملوا السلم الكبير وصعدنا على سطح العمارة ونزلنا على السلالم وهم أخذوا السلم ومشيوا .

وجدنا عم جرجس صاحب العمارة ومعاه شوية رجالة في الطرقة في أخر دور وقال لنا أن الشباب هنا فجينا على طول.اكملوا الشباب صلاة وحمد حتى امتلأ قلبهمأ بالسلام والفرح والاطمئنان .

قال مودي : ما أنتم تعرفوا تسهروا تصلوا أهو ، هو ايه أحسن نتجمع نشوف فيلم ولا نصلي ، عمركم ما اختبرتوا حلاوة السهر في الصلاة زي كده ؟

اجمعوا أنهم مقصرين وكانوا يجتمعوا للصلاة ودرس الكتاب في نهاية الأسبوع وأحيانا كانوا بيسمعوا فيلم لطيف . ولكن متعتهم كانت في تجمعهم ملبين طلب المسيح:

" أما تقدرون أن تسهروا معي ساعة واحدة " فكان رد قلوبهم : نعم نقدر.

كان شيطان التسلية متغاظ جداً من مودي ، كان قد أحكم الفخ البرئ على الشباب لإضعاف حياتهم الروحية وبسهولة يسقطون في الخطية فيزداد سيطرته عليهم أكثر فهو يعلم المكتوب :

"واظبوا على الصلاة ساهرين فيها بالشكر"

فهو يريد أن يملك الليل بكل الأشياء المبهرة الممتعة ما عدا الصلاة . فهو يعلم إن هم أدمنوا الصلاة صارت لهم أكثر إمتاعاً وتشويقاً وإثارة وإشباعاً لنفوسهم .