شياطين النت (8) عقاب مهين

 

(8) عقاب مهين

شيء واحد ملأ قلب وفكر عادل هو الانتقام من منال حبيبة عمره التي لم يحب سواها أنه يستغرب من نفسه كيف تحول الحب إلى كراهية وإلى السعي في تدمير الآخر والانتقام منه ... هل كان حبه حقيقي أم حب امتلاك عندما تقدم لها بعد إتمام تعليمه تحججت بالشقة أن مكانها شعبي وعاوزة حد يطلعها من المستوى اللي هي فيه لمستوى أعلى شوية . وعندما اجتهد وربنا كرمه رفضته باعتباره مش بتاع كنائس ، بيحضر قليل وهي عايزة واحد روحانياته عالية يدفع حياتها الروحية ويشجعها ، أخذ يفكر "أترمي في الكنيسة ليل نهار واشتغل وأجيب الشقة وأكون نفسي وأحضر القداس حتى خدمتي مع أخوة الرب ما أهملتهاش . هي عاوزة ايه بالضبط ولا هي مش عارفة هي عاوزة ايه ولاهي مضبطة مع واحد تاني "

حتى شاف على الفيس دعوة خطوبتها في كنيسة مارجرجس هليوبوليس وكان يوم عيد ميلاده مش عارف هي صدفة ولا مقصودة . هي الحياة قاسية عليه ولا هو غلطان أنه أحبها وركز عليها السنين اللي فاتت ، هو مش عارف خطيبها يطلع منين مش من كنيستهم خالص .

عموماً هو قرر أن ينتقم ، استغل صورها من على الفيس والانستجرام التي لا تحصى ولا تعد والتي تحكي كل تحركاتها ومواقفها من أول ما تصحى من النوم حتى تنام ، فاستخدم برنامج الفوتوشوب الذي يعمل عليه باحتراف وركب صورها على فتيات بورنو فتيات عاريات وفي أوضاع لا تليق وكانت صور في غاية الإتقان والروعة وعمل ملف كامل لها وأرسله إلى خطيبها على الفيس بوك بعد ما عمل أكونت مختلف وغير آي دي فظهر أنه من دولة أخرى وحط صور لا تدل على أي شخصية. وأرسل نفس الملف إلى منال بدون تهديد أو تعليق وجعلها في حيرة وأنتظر ماذا يكون رد الفعل .

ظهر له أنهما شافوا الملف ولكن مر يوم وأثنين وأسبوع كأنه لم يكن . استغرب جداً ، لادفاع عن النفس ولا شتيمة ولا أي حاجة !! وصورهم على الفيس معاً عادي خارجين آكلين شاربين مبسوطين ولا أيتها تأثير.

++++++++++++++++++++

وذات يوم وهو في مول سيتي ستارز بمدينة نصر وجد علياء زميلته في الكلية ماشفهاش من حوالي سبع سنين ، سلمت عليه علياء بحرارة وسألها : ايه يابنتي مش كنتي اتجوزتي ورحتي أمريكا ؟ ردت : ما أنا في زيارة لمصر لمدة شهر ، كويس اني قابلتك كنت عاوزاك في موضوع مهم كنت ها أكلمك على الواتساب . فاضي شوية تعالى نقعد في أي كافيه .

قعدوا في كافيه في المول

علياء: أولاً : أنت ارتبطت بالبنت اللي كنت داوشنا بيها دي اللي جبتها معاك هي وأخوها كام رحلة تبع الكلية ؟

عادل: لا رفضتني واتخطبت لواحد غيري من عشرة أيام .

علياء : الحمد لله كنت هاتدبس يا معلم .

عادل : ليه ؟

علياء : وصلتني صور ليها من على النت باين حد مهكر حسابها وهي عريانة وأوقات مش ولا بد .

عادل: ضحك يخرب بيتك . أنا قلت حاجة جامدة وخطيرة ما أنا اللي مركب الصور دي علشان أهينها وأنتقم منها علشان رفضتني مرتين .

علياء : يا ابن الأيه ده أنت زعلك وحش وأنتقامك صعب ما أعرفش أنك يطلع منك كده ، بس حرام عليك ده أنت شاطر قوي ، ده شغلك وصلنا أمريكا .

عادل: أي خدمة أتقي شر الحليم إذا غضب .

علياء: بس ازاي ركبت الفيديو ؟

عادل: مستغرباً فيديو ايه ؟ طيب وريني الصور دي معاك على الموبايل.

علياء : سهلة أشوفها لك ولو مالقيتهاش أنا عارفة الموقع . فتحت الموبايل وبسهولة طلعت الصور ووريتها له .

لما شافها عادل صعق جداً من الصور . كانت صور غير اللي ركبها كانت صور حقيقية لمنال هي بعينها بجمالها ولون شعرها وهي عارية وفي أوضاع أصعب من اللي ركبها.

علياء : سكت ليه شكلك مستغرب

عادل : لا مافيش بس شعرت بالندم أني عملت كده وما توقعتش أن الموضوع يوصل لأمريكا .

كان عادل مش عارف ليه كذب عليها وعلياء ذكية جداً لم تحرجه ولم تسأله على الفيديو الذي أرسلته هو والصور على الواتساب حالاً له وتركته علشان جوزها زمانه جه برة هيفوت عليها بالعربية وسابته في حيرة حقيقية ومش عارف ومش فاهم حاجة خالص.

+++++++++++++++++++++

هل يفضحها بجد على الانترنت وفي الكنيسة ولا يستر عليها ؟ هل هي فتاة بورنو وبتشتغل في الحاجات دي وخدعتهم كلهم ولا دي برضه صور متركبة بإحتراف ؟ حتى الفيديو ممكن يكون في برامج مونتاج تعمل كده ؟ هو بيبرر موقفها ليه ؟ هو لسه بيحبها ولا بيثبت لنفسه أنه ما اتخدعش ولا ايه ؟ أنا مش فاهم حاجة .

++++++++++++++++++++++

رن تليفون عادل برقم غريب قال له أنه خطيب منال وعاوز يقابله وحدد المكان والزمان وقابله في الكاتدرائية بجوار شغله في العباسية وكان اسمه أشرف.

أشرف : من غير لف ودوران أنت جبت الصور اللي بعتها منين ؟

عادل : صور ايه وبتاع ايه ؟

أشرف : ما تلفش وتدور علي أنا ومنال عارفين أنك اللي بعت الصور مافيش حد غيرك يعمل كده ولديك دوافعك .

عادل ... بعد ما أتأكد أنه لا مفر للكذب غير أنه يجد فرصة لإذلاله .

قال : أنا ركبتها على الفوتوشوب.

أشرف : يعني أنت مصدرها الحمد لله . بعتها لحد تاني غيري أنا ومنال ؟

عادل : لا مافيش غيرها .  واستغرب عادل لرد فعل أشرف فقصد يحرجه أكثر فأخرج الفيديو والصور التي أرسلتها له علياء .

أشرف : هي دي هي لسه موجودة ده أنا عملت (ريبورت) وبعت لكل المواقع واليوتيوب علشان تحذف .

عادل : أنا مش فاهم حاجة يعني حضرتك عندك علم أنها فتاة بورنو وكانت بتبيع جسدها ومع ذلك خطبتها ازاي!!

أشرف : عاوز أصحح معلوماتك هي كانت وتابت ، هي معايا في الشغل ، قربت منها وقررت أرتبط بيها وهي وافقت فأنا مادياً هانقلها وشقتي في مكان محترم . لكن قبل ما أتقدم رسمي قالت لي عنك وعرفت رفضتك ليه مرتين مع أنها بتعزك جداً وبتحترمك جداً وأنت غالي جداً عليها ولكن مارضيتش تخدعك وتعيش معاك في خداع واتفقنا أقولك السر .

منال وهي في الفرقة الثانية في الكلية عرض عليها شخص أنها تشتغل في التمثيل وتعمل فيلم شبابي حيث أنها جميلة وقوامها جذاب في مقابل خمسين ألف جنيه وأعطاها المبلغ مقدماً ووافقت وأخذت المبلغ وأعطته كله لأبوها حيث أنه كان مريض بالقلب وكانت عملية كبيرة وفي وقتها كانت تكلف حوالي خمسين ألف جنيه ولم يكونوا يعرفوا أنه كان ممكن يعملها على نفقة الدولة ولكن كان سيدخل في قوائم إنتظار وحالته لا تسمح . وعمل العملية ونجحت وخف وبقى كويس جداً حتى حضرتك جيت زرته في المستشفى واتأخر ميعاد تصوير الفيلم والفلوس اتصرفت وكانت خايفة الفيلم يتلغي .

ولما جه التصوير وكان اللوكيشن شقة كبيرة في المعادي في منطقة هادية ولما طلعت الشقة لقيت المخرج وآلات التصوير وكل شغل السيما وكان كل التصوير على السرير وطلب منها أن تبدأ تمثل وحاولت تهرب ولكن أمسكوها وقالوا لها أنت رايحة فين هاتي الفلوس وكمان أنت خايفة ليه ده فيلم هيتعرض في أمريكا مش مصر ومش ها يمس شرفك قبلات وأحضان بس رفضت بشدة ولكن غصبوها ومثلت الفيلم بمرارة وكرهت جسدها ونفسها وصورها بملابس عارية وملابس مثيرة ، كان الأمر بالنسبة لها شغل ولا ثمن لجسدها !

خلصت وروحت ولم تفقد شرفها بل فقدت كرامتها وإنسانيتها وقالت إذا أرتبطت بك لازم كانت تقول لك وهي عارفة طبعك حامي كنت فضحتها في كل الكنيسة وهو اللي حصل لما رفضتك.

حكت لي الموضوع وقالت لي القرار قرارك وهي هاتسيب الشغل وأنا أخذت قراري وقررت اني ارتبط بها واسترها وصدقت كل كلمة قالتها فالمحبة تصدق والمحبة تستر .

عادل : أنا ماكنتش عارف حاجة خالص كنت ظالمها وأنا فرحان إنها ارتبطت بإنسان عاقل ومحترم زيك وبيحبها بجد . سامحني وأنا كمان قدرت ظروفها بس أنت تستحقها أنت عرفت تحب بجد وأنا ماحبتهاش بجد كنت بحب نفسي أكثر .

وأنت بتحكي معايا وكلك ثقة فيها وليس لديك ذرة شك . حقيقي أنت عظيم وسلم لي عليها وسوف أحضر فرحكم . هامسح الفيديو والصور من عندي ومن أي حتة اشوفه فيها .

حقيقي المحبة تستر