شياطين النت 5) عروض لا تصدق !! إبليس من فضلك حل مشكلتي

 

5) عروض لا تصدق !!

إبليس من فضلك حل مشكلتي

رن جرس منزل الأستاذ عدلي مدرس الكيمياء في شقته في مدينة نصر فوجد أمامه ابن عمه كمال من البلد ومعه وزجته وأبوه وأمه .

عدلي : ايه المفاجأة الحلوة دي أهلاً وسهلاً خطوة عزيزة عمي ومرات عمي كمان .

عمه شوقي : معلش أنا في مهمة في مصر ومالناش حد غيرك ومش معانا نمرتك علشان نتصل بس عارفين البيت .

عدلي : البيت بيتك

جلسوا وارتاحوا وأكلوا وجلسوا ليشاوروا عدلي في المهمة.

كمال : أنت عارف إني متجوز وداخل على سنة دلوقتي وماخلفتش .

عدلي: ربنا يديك ويفرح قلبك .وانتم جايين تكشفوا حجزتم عند دكتور مين وأنا هأوصلكم .

شوقي : دكتور مين يا أستاذ ده معمول له عمل ومربوط علشان ما يخلفش ابني زي الفل ومراته زي الفل .

كمال : أنت عارف إني معايا دبلوم وبحب النت وشاطر فيه قعدت أدور على حد يفكني كلهم من بتوع أفريقيا  ومغاربة أنا عاوز واحد مصري ويكون بيفك بالمزامير مش عاوز حد بتاع جدل وشعوذة هي مش ناقصة .

عدلي وقف متسمر ومذهول من الكلام وأخذ يجاريه في الكلام : ووصلت لايه ؟

عم شوقي : بيقول في ناس كتيرة على الفي سبوك عاملين أعلانات.

عدلي: زي ايه ؟

قام كمال وفتح الموبايل بتاعه وأخذ يقرأ له العروض التي لا تصدق وقال : اسمع يا سيدي

"ساحر مداوي لي 30 سنة من الخبرة استطيع جعل أي امرأة تقع في غرامك وتأتي إليك باكية راكعة عند رجليك . ده ياسيدي متخصص إتيان الحبيب .

عدلي : ضاحكاً أنت بتصدق الكلام ده

شوقي : وليه لا مش في سحر أسود وسحر أبيض ده سحر أبيض مش بيأذي بيعملوا به الخير

عدلي: لا مافيش سحر أسود ولا أبيض كله سحر وخداع من إبليس واحتيال لنهب الأموال من الغلابة والجهلة .

كمال : واسمع عن الأسعار والإمكانيات . 

        إعلان "زوجتك ستعود زحفاً على ركبها في خلال خمس أيام . السعر 1000يورو حسب المجهود المبذول وأقل حاجة 100 يورو"

كمال : هو اليورو ده مش زي الدولار بس بتاع أوروبا ؟

عدلي : صح ما أنت مثقف أهو . كمل إعلاناتك.

هناك أقفال للحفاظ على الحبيب وخواتم سحرية للتداوي من العقم وتمائم لاجتذاب النساء ومحافظ سحرية لكسب الثروة وتعاويذ أشكال و أنواع لحل المشاكل المستعصية وشفاء الأمراض .

(وشوف ده يا عدلي ) قال كمال

عدلي : قول ماله ده

إعلان (استطيع أن أطيل قامتك حتى ثلاث أمتار )

عدلي : مش معقول ده نصب

شوقي : قوله على إعلان طاقية الإخفاء.

كمال : في واحد اسمه (بابا عمر) يقول أنه له قدرات شيطانية يستطيع بواسطتها جعل الشخص غير مرئي وتمكينه من اختراق الجدران والسعر 485 يورو .

ايه الكلام الفارغ ده

شوقي : أنا بعت لواحد على الإيميل فبعت لي استمارة بالبريد الالكتروني لإملائها وأبعت له تحويل أموال على ويسترن يونيوت لكي يشتري عناصر الوصفة السحرية .

عدلي : وبعت له ؟

شوقي : لا طبعاً هو احنا عبط ده نصب في نصب.

عدلي : لا شاطر وبتاع مدينة نصر مش نصاب .

شوقي : هو في الأرياف ده في مكان فخم جداً وده اسمه معالج روحاني مش دجال .

زوجة كمال : قول له على اللي رعبنا وخوفنا .

كمال : اسكت ! دخلت موقع وعرف اسمي وعرف مين معايا في الشقة وعرف مراتي بتعمل ايه دلوقتي وكان كلامه صعب.

عدلي : ايه المشكلة عليه روح عرافة روح شيطانية والتمادي في الحاجات دي خطيرة . وميعادكم امتى عند بتاع مدينة نصر ده؟

شوقي : بكرة الساعة 10 ليلاً

عدلي : ميعاده متأخر كده ليه؟

كمال : أصله عليه ضغط ولقينا الميعاد ده بالعافية ده احنا حاجزين من شهر .

عدلي: من شهر ! وهاتدفعوا كام ؟

شوقي : عشرة آلاف جنيه.

عدلي : عشرة آلاف جنيه كتير يا عمي .

ثم فكر عدلي وقال أنا هافك العمل بالمزامير من غير ولا مليم.

كمال : أنت ! ازاي؟

عدلي : جربني وشوف بكرة الصبح الساعة 10 صباحاً موعدنا وكويس بكرة الجمعة عندي أجازة من المدرسة

اتفقنا ودخلوا كلهم ناموا.

+++++++++++++++++++

قام مبكراً عدلي وأعد العدة واستيقظوا جميعاً وأعد لهم الإفطار فهو يعيش لوحده منذ وفاة زوجته وجواز بنته الوحيدة فهو في الخمسين من عمره ولكن وجهه كأنه شاب صغير في الثلاثينات.

اجتمعوا حول مائدة السفرة بعد الإفطار ووضع عدلي حلة فيها ميه سخنة وفتح الغطاء وقال هذه مية سخنة والعمل بتاعه معمول بسبع حبات . أنا هأصلي بالمزامير ونغطي الحلة ولما نفتح الحلة هتلاقوا العمل في شاشة بها السبع حبات وتبقى اتفكيت وتقدر تخلف .

أخذ يصلي عدلي من المزامير بصوته الجميل مزامير مختلفة منها مزمور 20 ، 23 ،  27 ، 51 ، 54، 60 ، 91 ومزامير كثيرة وختم بأخر عشر مزامير في المزامير ثم قال الآن ينفك عمل كمال ويخلف في الحال .

وفتح غطاء الحلة فوجودا الشاشة البيضاء وبها سبع حبات فانبهروا وزغردت أم كمال وفرحت زوجته وحضنوه وشكروه وهم مستغربين ولم يذهبوا إلى الدجال ورجعوا إلى البلد وقالهم عدلي حطوا حاجة لربنا من الفلوس في الكنيسة شكر لله وهاتوا أكل حلو ومغذي لكمال .

وفعلاً سمع عدلي في خلال شهر أن زوجة كمال حامل فاتصلوا به وشكروه وأصر كمال أن يرجع لمصر ومعاه زيارة لعدلي من خيرات البلد وأن يشكره بنفسه مش في التليفون ولما جاء فتح عدلي الحديث معه وقال له : في سر عاوز أقوله لك .

كمال : سر ايه ؟

عدلي : أولاً مش عاوزك تصدق كلام النت والسحرة على الانترنت والفيس بوك ده كله من إبليس وجدل ونصابين .

كمال : عندك حق ياأبن عمي . ايه السر بقى؟

عدلي : فاكر لما كنتم عندي من شهر أنا صحيت الصبح وجبت حلة الغطاء بتاعها منها فيها وفي الغطاء من الداخل فيه فراغ أنا حطيت الشاشة الصغيرة وحطيت فيها السبع حبات وصبيت عليها شمع حتى نشف وعندما غطيت الغطاء المية السخنة سيحت الشمع فسقطت الشاشة في المية وانتم افتكرتم اني فكيت العمل . العمل كان في دماغكم . أنت كنت مصدق أنه عليك عمل وصرت مصدق أنك اتفكيت بقوة الإيحاء وثقت في نفسك وتشجعت ومارست دورك كزوج والرب أعطاك وباركك وشاء في الوقت المناسب فأنا مش قديس أنا راجل كيميائي ولا أومن  بالخرافات وحتى إن كان في أعمال من إبليس فقوة اسم يسوع أقوى ودمه الكريم يسحق كل أعمال إبليس فالمسيح قد جاء لكي ينقض كل أعمال إبليس فقرب من الرب والكنيسة واحتمي فيه واتكل عليه وعلى قوته مش على إبليس وخداعه وطرقه . فاهم يا كمال.

كمال : فهمت عند حق.