رواية الانجيل الخامس 2- انجيل ايرينى ( انجيل بلا نعمة )

 

(2) انجيل ايريني

                           (انجيل بلا نعمة)

"لم تقاوموا بعد حتى الدم مجاهدين ضد الخطية " (عب4:12) (ايريني7:1)

ايريني الشابة التي تريد خلاص نفسها هذه من أهم الأيات المقتبسة من انجيلها وهي تضع أمامها باستمرار " تمموا خلاصكم بخوف ورعدة " (في12:2) وبدأت حربها ضد الخطية منذ سن اعدادي كانت تحاول أن تبطل الغضب والنرفزة وكانت لا تقدر وفي سن المراهقة كان بداخلها صراع في التغلب على الشهوة والعواطف والشتيمة والكذب والافتخار بالذات مع الغضب والادانة والنميمة . قررت أن تخلص من كل هذه الخطايا فهي تريد ان يكون لها نصيب في ملكوت السموات

قائمة الجهاد :-

قرأت ايريني عن راهبة كاثولكية كانت تصعد مدرجات كنيسة الفاتيكان على ركبتيها حتى يغفر لها الله خطاياها وكانت تتألم وتدمى ركبتيها وبالنسبة لها ولا حاجة

قررت ايريني أن تبدأ حربها وكتبت قائمة بالخطايا والممنوعات وسوف تمتنع عن كل خطية واحدة واحدة كل يوم خطية وكتبت القائمة:-

1)التقصير في قراءة الكتاب المقدس والصلاة

2) الشتيمة                        3) الكذب                   4) النرفزة

5) الادانة والنميمة مع سلوى سأقلل في الكلام معها

6) التفكير في امور رومانسية وشهوانية بتكتر في جلستي مع مروة قبل وبعد درس الفيزياء سابتعد عن مروة ومغامراتها العاطفية والرومانسية

7) عدم الغفران                     8) الانانية والطمع أنا اولاً

9) علاقتي مع سامح ( يجب ان يكون لها حدود واضحة وان لم توجد حدود فاقطع العلاقة)

10) عدم الامانة في المذاكرة

___________________

وبدأت الحرب:-

قابلتها ميس ميرنا في حوش الكنيسة

ميرنا : مالك يا ايريني شكلك حزينة ومش فرحانة

ايريني : اصل النهاردة اخر يوم لي في الكنيسة ومع ربنا ومن بكرة هابدأ اعيش حياتي واعيش زي ما أهل العالم عايشين

ميرنا : ايه الكلام الغريب ده ، ده انت بنت ملتزمة وحلوة وبتحبي ربنا

ايريني : مش عارفة اعيش له ، كتبت قائمة بأبرز عشر خطايا وكنت كل يوم ابطل خطية وامتنع عنها ، كنت امسك لساني حتى لا اشتم ، وكنت امسك اعصابي فلا اتنرفز ، امتنعت على مشاهدة المسلسلات اللي بتضيع وقت ربنا وتثير في العواطف والمشاعر والشهوة ، صمت الاربع والجمعة بدون طعام نهائي حتى المغرب ومع الوقت كنت اصوم اربع وخميس وجمعة واقضي ليلة الخميس في الصلاة سهرانة وامتنعت عن الاغاني العاطفية تماماً

ميرنا : شاطورة انت شاطرة قوي ده انا مش بعمل زيك

ايريني : وياريته جاب نتيجة

ميرنا : ازاي فهميني

ايريني : بعد ما خلصت القائمة واخذت قرارات حاسمة في حاجات كثيرة وقعت في كل الخطايا اللي فيها في يوم واحد فأنا تعبت وبقى لي شهور باعمل كده وابدأ من جديد وافشل . وانا مش باعرف امسك العصايا من النص اما ان اعيش لربنا بالكامل او اعيش لنفسي والعالم علشان كده ما دام فشلت في طريق ربنا هابدأ اعيش حياتي بلا صلاة وصوم وقداسات وتناول واجتماعات مالهوش لازمة مش بتغير

ميرنا : ابدأي من جديد والرب يعينك بس انت مش ملاحظة حاجة

ايريني : ايه هي؟

ميرنا: كلامك شكله حلو ولكن بدون المسيح اللي يقويك ويبطل فيك الحاجات دي ، جهاد بلا نعمة جهاد بلا ثمر فكل الاديان تجاهد لكي يخلصوا من خطاياهم ولكن خلاص بدون مسيح بدون ذبيحة للخطية وانت بتتبعي نفس الاسلوب

ايريني : يعني ما اجاهد في شئ؟

ميرنا : لا . تجاهدي ولكن باعتدال وتحت ارشاد انت عليك دور وربنا عليه دور زي الفلاح بيحرث الارض ويبذر البذار ويضع الاسمدة ويحميها من الآفات ولكن بدون المطر بتاع ربنا وبدون الرب لا شئ لانه هو الذي ينمي. لو ربنا امطر على ارض بور ومافيهاش بذار مش هيطلع زرع

ايريني : فهمت . بعد اذنك عندي درس وانصرفت وهي تفكر

___________

 

لقاء في اوبر:-

طلبت اوبر فالدرس في سنتر في مدينة نصر وهي في الزيتون ، جلست وحددت هي رايحة فين واخذت تفكر في كلام ميس ميرنا  وقالت في نفسها : النتيجة النهائية للي عملته اني حاسة اني وحشة قوي وكلي خطية وماقدرتش اخلص نفسي وزعلانة قوي من نفسي ومابقتش فرحانة ودايماً مهمومة . خلاص هاكمل وحاشة بوحاشة هي زي ما هي ، هاكلم سامح هاخليه ييجي لي بعد السنتر وهاقعد مع مروة كلامها وحشني واتسلى مع سلوى ما هي مسيحية برضه وبتاعة كنائس وزي الفل بس انا اللي محبكاها حبتين . ما انا زبالة وماستحقش اعيش مع ربنا ولا استحق انه يغفر لي خطاياي وعدته كتير وبارجع واعملها .

وفيما هي تفكر والمحلات تمر من امامها وفجأة لمحت محل اسمه "الماحي" ووجدت الرب يكلمها في قلبها : "انا انا هو الماحي ذنوبك لاجل نفسي وخطاياك لا اعود اذكرها " وشعرت انها هي والرب فقط في العربية وقال لها : يا ايريني انا احبك وانا هامحي كل ذنوبك لاجل نفسي لا لاجل جهادك وتعبك وكل خطاياك قد غفرتها لاجل دمي المسفوك علشانك.

فبكت ايريني بكاء حب للرب اللي عايزة تسيبه بس هو بيدور عليها وعايزها وبيحبها رغم وحشتها ورغم خطاياها .

لاحظ السائق دموعها وبكائها وسألها : حضرتك في حاجة

ايريني : لو سمحت ممكن ارجع تاني الزيتون . فرجع السواق بها وهو مستغرب

_____________________

صعدت الى شقتهم في البرج المجاور لكنيسة العذراء بالزيتون فوجدت الشقة فاضية افتكرت ان باباها في الشغل واخواتها في الكنيسة والدروس ومامتها عند خالتها المريضة في عين شمس

دخلت حجرتها وفتحت كتابها وفتحت اصحاحها (عب12) الاصحاح اللي بتحبه واخذت تقرأ وتبحث عن يسوع ومش بتبحث عن دورها اللي هي عارفاه كويس وجدت الآيات التي لم تخطط عليها خططت " ولنحاضر بالصبر في الجهاد الموضوع امامنا " (عدد 1) ولم تخطط على "لنطرح كل ثقل والخطية المحيطة بنا بسهولة" ولم تخطط على "ناظرين الى رئيس الايمان ومكمله" ولم تفكر في عدد 3" ففكروا في (اي المسيح) الذي احتمل من الخطاة مقاومة لنفسه لئلا تكلوا وتخوروا في نفوسكم"  - فهمت لانها لم تضع يسوع امامها فكلت وخارت في نفسها ولم تنظر الى رئيس الايمان ومكمله وعمله لاجلها قبل ما تنظر الى نفسها وعملها لاجله.

ركعت بجوار سريرها معترفة بخطاياها طالبة النعمة ومساندة روحه القدوس فهي خاطئة جداً فطلبت بره وقداسته وغفرانه لخطاياها لا لاجل جهادها ولكن لاجل نفسه لاجل عمله على الصليب لاجل دمه المسفوك لا لاجل عملها بل عمله.

شعرت بفرح عظيم يملأ كيانها وسلام الله الذي يفوق كل عقل يغمرها وقامت منتصرة بانتصار يسوع ومبتهجة بعمل يسوع

___________________

تغير ملحوظ:-

لاتستطيع ايريني ان تفسر ما حدث لها سوى انها قابلت الرب يسوع فكانت تسير في الكنيسة بتتنطط من الفرح والضحكة تملأ وجهها قابلت احدى صديقاتها فقالت لها : النهاردة شكلك حلو ردت عليها : ربنا يخليك . قالت صديقتها : على فكرة ميس ميرنا بتدور عليك وهي في المكتبة دلوقتي . ذهبت ايريني مسرعة الى المكتبة فوجدت ميس ميرنا واول ما لاقيتها قالت لها ميرنا خير شكلك حلو وفرحانه ايه اللي حصل

حكت لها ايريني كل اللي حصل

ميرنا : يعني كده خلصنا جهاد؟

ايريني : لا زودنا الجهاد وبقى اكتر

ميرنا : ازاي

ايريني : الاول جهاد علشان ابطل خطية ولكن الان جهاد علشان اعرف يسوع اكتر وعشان اكتسب فضائل ، جهاد ايجابي جهاد مفرح

ميرنا : طيب وخطاياك والامور اللي بتحاربي عشانها؟

ايريني : مش عارفة راحت فين بس مش قادرة اشتم ولا قادرة اكذب قلبي بيوجعني قوي ولا طايقة اي كلام نجس او شهوة ومش عايزة اي علاقات تافهة حاسة اني شعبانة ومش عايزة حاجة تعكر صفو حياتي او تمنع عني البركة او تسرق مني فرحتي وسلامي وانطلاقي فبقيت اجاهد اكثر حباً وشوقاً يسوع غيرني بجد.

تعرفي يا ميس ميرنا عارفة ايه كانت مشكلتي

ميرنا : ايه

ايريني : انا انجيلي كان ناقص كنت عايشة بانجيل على مزاجي واعلاناته عن المسيح ماكنتش واضحة . الكتاب المقدس صار لي كتاب جديد ليس كتاب اوامر وجهاد بل صار كتاب حب